السلام عليكم ورحمة الله وبركاته
اهلا والله بالقيمرز الأساطير، ويسعد لي أوقاتكم بكل خير وروقان.
كلنا ندخل عالم الجيمنج على الـ PC عشان نفصل من ضغط الحياة والدوام، ونبي نعيش جو المتعة والوضوح الخرافي قدام السيت أب حقنا. لكن الصدمة الحقيقية ما تكون من قوة كرت الشاشة ولا السيرفرات، الصدمة تجيك من "العينات المريضة" اللي تقابلها في سيرفرات الأونلاين! بشر عقولها صغيرة وتصرفاتهم تجيب الجلطة وترفع الضغط. اليوم فككنا لكم "كتالوج" ألعن 9 عينات مريضة بتشوفها في ألعاب الأونلاين على البي سي، واللي مخلية مجتمع اللاعبين مستنقع حقيقي!
ونصحيه اذا شفتهم انصحك اترك القيم ورح اتمشى
1. عينة "الديسكو المتنقل" (مشغل الأغاني والشيلات)
الوضع عنده: ما تدري وش يحس فيه! داخل الجيم وفاتح المايك "عام" على آخره، يفجر أذنك بصوت وشوشة وزنة، ومشغل لك شيلات ولا أغاني ومسوي فيها إنه ضابط الجو ومروق! يا ابن الحلال إحنا داخلين ديسكورد ولعبة تكتيكية عشان نسمع خطوات العدو مو داخلين قاعة أفراح ولا استراحة! باقي بس يقوم يرقص اهم شي لايستنزل وإذا قلت له قصر الصوت، نفس عليك وبدأ يسب.
2. عينة الا يبي بنات في التيم
المرض النفسي: هذا داخل الجيم ومضيع الوجهة تماماً، ما يهمه لا فوز ولا خسارة ولا تكتيك، كل وهمه في الحياة يسأل: "في بنات بالتيم؟". يا كابتن ترى هذي لعبة حرب وطخ وطيخ ومواجهة حاسمة، مب كافيه ولا أنت جالس اركّد واسترجل معنا وخلي عيونك على الخريطة.
3. عينة "نفسية كأس العالم" (السب والشتم بسبب هزيمة)
العقدة: مستعد يلعن ويسب ويشتم ويقلبها قلة حيا وتدني أخلاقي بالمايك أو الشات بس عشان التيم "خسر قيم" أو لأنك ما لعبت على كيفه! كأن الحياة واقفة على هالمباراة، ناس عقولها صغيرة، ما عندها أي روح رياضية ولا ذوق، وتخرب المزاج في ثواني.
4. عينة "مجلس الشيبان" (جالس في جلسة أنت؟)
الهذره الزايده: هذا داخل الجيم بس عشان يسولف ويغرد خارج السرب! يفتح المايك ويقعد يقول قصة حياته، وش أكل وش شرب اليوم، ومشاكله مع الدوام. يا الغالي ركز في الجيم والعدو جالس يجلدنا قدامك، إذا تبي تسولف وتفضفض اطلب لك شاهي واجلس في استراحة، مب بوسط المعركة!
5. عينة "الجمعية الخيرية" (حق الإطعام والـ Feeding)
النذالة: يمشي ويدعم بوسط الأعداء ويموت مجانًا كأنه جالس يوزع عليهم نقاط وجوائز عشان يكبرهم ويقويهم علينا (Feeding)! ترى المواجهة مب جمعية خيرية عشان تدعم الخصم، اكرف وتكتك معنا ولا اترك الماوس والكيبورد واطلع برى الجيم!
6. عينة "العبقريه اللي رايحه فيها" (راعي السكين والمدرعمة)
العبقرية المضروبة: اللعبة فيها أسلحة، ورشاشات، وقنابل، واستراتيجية وتنسيق.. وهو يخلي هذا كله، ويسحب لك السكين أو الساطور، ويدرعم في نص الخريطة مكشوف قدام كل الرادارات! مفكر نفسه "جون ويك" أو داخل فزعة حواري! ومع الدرعمه اول واحد مسك الارض النتيجة الحتمية؟ ينصهر ويموت في أول ثانيتين، ويعيدها طول الجيم.
7. عينة "التائه في ملكوت الله" (اللي ما يدري وين يروح)
الضياع: الخريطة واضحة قدامه، والشباب يصارخون بالديسكورد "العدو في الـ B"، والتيم كله رايح يمين.. وحضرة الجناب تلقاه ماسك الجدار ويمشي يسار، أو جالس يتأمل في تفاصيل السماء والغيوم وحيطان اللعبة! ماله أي هدف، ولو تسأله وين رايح؟ ما يدري وين ربي حاطه، كأنه يدور بوكيمون!
8. عينة "الجنرال المسبوك" (مسوي فيها الكابتن على غفلة)
البثارة التكتيكية: هذا عاد مفكر نفسه "الكابتن ماجد" أو مشرف تربوي جاي يوزع أوامر عسكرية في السيرفر! يفتح المايك ويبدأ يصارخ: "أنت خلك بالزاوية، أنت لا تقدم، أنت روح هناك!". يا ابن الحلال ترى داخلين نستانس ونطقطق ومب على كيفك تمشينا على العجين ما نلخبطوش! والمشكلة لو سحبت عليه ولعبت بأسلوبك، يقعد ينق عليك طول الجيم وينفس ويخرب الأجواء كأنك عاصي أوامره العسكرية الطاحنة!
9. "المُهكّر المريض" (رأس الأفعى صاحب المود والتشيت)
قمة النذالة: هذا ألعن صنف في تاريخ الجيمنج كله، اللي يخليك تقفل البي سي بكبره وتدعي عليه! مريض نفسي يحس بنقص ويبي يعوضه بفوز وهمي ومغشوش؛ مفعّل "Wallhack" يشوفك من وراء الجدران، ولا الأيم حقه لقط تلقائي (Aimbot). المشكلة مسوي فيها المحترف الأسطوري وهو لو تطفئ عليه الهكر ما يعرف يمسك الماوس أصلاً! يخرب متعة اللعب بشرف ويسد النفس.
الخاتمة:
في النهاية، بعد ما تشوف هالمستنقع وهالعينات المريضة اللي ترفع الضغط وتجيب الجلطة، تعرف إن الاعتزال واللجوء لألعاب القصة الفردية (Single-player) هو أكبر مكسب لكرامتك وراحة بالك. خلك ملك في عالمك الخاص، هدوء وروقان وإضاءة سيت أب هادية، بعيداً عن صجة بشر ما تربت ولا تعرف أصول اللعب!
شاركوني في التعليقات: وش ألعن عينة من هالمذكورين تقابلونها دايماً وتخرب جوكم؟ ونشوفكم على خير في تدوينة جاية يا أساطير!
واتمنى انه المدونه نالت على اعجابكم واسف لو طولت عليكم
دمتم في حفظ الرحمن
