السلام عليكم ورحمة الله وبركاته
شخباركم شلونكم عساكم كلكم طيبين
يا هلا بالشباب الطيبين، ومصبحكم الله بالخير والضحك.
بما أن المنظومة الأولى كانت رسمية ونصائح دينية وأخلاقية، الحين جالس أشوف العجايب في اللوبيات وقررت أعطيكم "الجرعة الثانية" من النصائح، بس هالمرة بدون مجاملات.. كلام كاش وبطعم الكوميديا والجلد لبعض العينات اللي لازم تعدل وضعها!
🦧 أولاً: جماعة "الجمبازي" والظهر المنحني
الواقع: تلعب وأنت منحني ومقوس ظهرك ومقرب خشمك من الشاشة كأنك تدور مفقودات؟
النصيحة: لا تجيني عقب القيم تشتكي وتقول "آخ يا ظهري"، تراني قيمر وخويك في اللوبي مب دكتور عظام وعلاج طبيعي! اعدل ظهرك ولا تسوي فيها وضعية "التنين المقوس".
🪑 ثانياً: أصحاب كراسي المطبخ والحوش
الواقع: حاط لي كرسي خشب حق المطبخ، أو كرسي حديد من حقين الحوش وجالس عليه 6 ساعات متواصلة؟
النصيحة: طبيعي جداً بتسمع عقبها "أح أح يمه وش هالوجع!".. يا خوي وش متوقع؟ جالس على حديد وتبي ظهرك يصير حرير؟ اشتر لك كرسي صاحي أو افرش لك وسادة، ولا تقعد تقلب اللوبي مناحة و"يمه لحقيني".
🏆 ثالثاً: ملوك الإنجازات الوهمية (مختم اللعبة)
الواقع: يجيك هذاك اللي يزعج أم اللوبي وكل شوي: "هاه أنا ختمت اللعبة قبلكم! هاه أنا أول واحد يوصل ليفل مكس!".
النصيحة: تراااااه مب إنجاز يرحم والديك! ما راح يعطونك جائزة نوبل في الجيمينج، ولا اسمك بينزل في كتاب التاريخ. اقعد مكانك واعقل ولا تشغلنا معك يالخوي، خلنا نستمتع باللعب بدون استعراض.
📞 رابعاً: المنتهي "وين أروح وش أسوي؟"
الواقع: خويك اللي أنت حمسته يشتري لعبة قصة أو مغامرات، ومن أول ما يشغلها وكل خمس دقايق يدق عليك أو يرسل بالواتساب.
النصيحة: "ها وين أروح؟ ها كيف أفتح الباب؟ ها وش أسوي؟".. يا أخي ارحمني! العب واكتشف اللعبة بنفسك! وش حلاوة اللعبة إذا أنا جالس أختمها لك بالريموت كونترول من بيتي؟ شغل مخك شوي وعش المغامرة ولا تصير علة!
وعشان نكون على بينة يا أصحاب، تراه مو عيب أبداً إن الواحد يسترخي وهو يلعب، بس العيب إنك تقلب قعدتك لـ "موقع إزالة تنقيب آثار" وأنت تدور وضعيات تخليك تخلص اللعبة غصب! خذوا الأمور بروقان، واسترخوا على كراسيكم بدل ما تطلعون ضغطكم في الظهر والعصب، وتذكروا دائماً إن الضحكة والسوالف مع الربع تسوى الدنيا وما فيها!
وفي الختام، أدري إن الكلام قوي وبدون بنج، بس هذا الواقع المر اللي نشوفه كل يوم. أتمنى ما طولت عليكم، واللبيبُ بالإشارةِ يفهمُ.. اعدلوا ظهوركم وبطلوا أسئلة!
والى هنا ايها الأساطير نصل إلى ختام المدونه
وفي الختام
نستودعكم الله والسلام عليكم ورحمة الله
في امان الله
