السلام عليكم ورحمة الله وبركاته
يا هلا والله بالشباب والشركاء في رحلة الكفاح.. أرحبوا! أخباركم؟ علومكم؟ عساكم طيبين ومرتاحين ومو واقفين على رجولكم مثلي! قبل لا نبدء صلوا على النبي
اليوم جالس وأنا ممدد رجولي، وأطالع في هالجوال.. وتعرفون، الواحد أحياناً يبي يروق ويتابع له بث قيمينق (Gaming Live Stream) يشوف ناس تلعب، تطقطق، ويغير جو. لكن يا جماعة اللي جالس يصير في بعض البثوث يخلي الواحد وده يمسح التطبيق وينام! مدري هم وش يفكرون فيه بالضبط؟ تعالوا خلوني أفضفض لكم عن "أساطير البثوث" اللي مروا علي اليومين هذي:
1. الكابتن "أول مرة يلعب" 👶🎮
تطري على بالك تفتح بث، وتدخل تلقى واحد ماسك اليد وكأنه أول مرة يشوف جهاز سوني في حياته! يمين.. يسار.. يطير في الجدار، ويموت من أول جندي في اللعبة. يا ابن الحلال، دامك توك تقول "بسم الله" وتجرب اللعبة، ليه فاتح بث ومقعدنا نتابع معاناة عيونك؟ تدرب شوي وبيض الوجه بعدين افتح لنا بث ونصفق لك! ترى مب عيب اذا ماتقدر سكر البث
2. صاحب مايك "العج والغبار" 🌪️🎙️
هذا عاد عذاب عصبي وجسدي! تدخل البث تبي تسمع صوت اللعبة أو سوالف الآدمي، تفاجأ بصوت "خررررر خررررر تشششش".. خرخشة وقسم بالله تقول الآدمي جالس في صندوق ونيت ويسوق في خط سريع وسط عاصفة غبار وعج!
ياخي تبي تبث؟ حط مايك سنع! الدنيا تطورت ويا كثر المايكات أشكال وألوان في السوق، ما يحتاج تخرش أذن المتابعين عشان بث. (وعلى طاري المايكات السنعة والمريحة، تراني ضبطت لكم كم صوره حق المايكات اللي تعزل الصوت وتخلي صوتك فخم كأنك في إذاعة ، لا تطلعون بثوث وتجيبون يلا شوفوا الصوره
وكذلك ما نسينا الاخوات الاناث
3. النفسية.. "أبي ناس محددة!" 😒
تلقى واحد فاتح بث عام، وإذا دخلت وكتبت له "يا هلا" أو سألته عن اللعبة، يعطيك ركبة وما يرد عليك. ليه؟ الحبيب يبي ناس محددة تلعب معه أو تسولف معه، والباقين كأنهم جدار! طيب يا كابتن دامك تبي ربعك بس، اقلب البث "خاص" وفكنا من نفسيتك الله يهديك، المتابعين مو جايين يشحذون منك كلمة
وترى وجودهم معك مايضرك وخذ واعطي معهم حسبهم في بثك
4. اللي يسب.. عشان "الوحش سدحه"! 🤬👾
تدخل تلقى الأخ يلعب ومتحمس، وفجأة يطلع له وحش في اللعبة ويسدحه أرض. هنا تبدأ الحفلة! يقلب البث سب وشتم ولعن في اللعبة وفي المطور وفي الساعة اللي شرى فيها الجهاز. يا بوي روقنا، تراه جيم و"الوحش" شغلته يسدحك بس ترا ولا تبيه اول مايشوفك يصب لك شاي ويقهويك ويقولك ارحبوا ترى التربية الاخلاق زينة حتى وراء الشاشات مافيها شي سطرك ومسح فيك الأرض خلاص عادي ليه السب والشتم
5. "ذا فويس" المطبخ الفاشل 🎤 صك أذنك!
وهذا الختام المسك.. واحد منسجم يلعب "كول اوف ديوتي" او اي لعبه قتاليه وفجأة يقلب لك البث حفلة غنائية! يغني بصوت يخلي جدران الغرفة تصيح وتقول بس يا خوي من زين الصوت عاد؟ وثانياً ترى مب حنا حكام برنامج مواهب عشان تقعد تغني فوق راسنا وإحنا نبي نشوف اللعب وطقطقة السوالف. اشفيك أنت؟!
مخرج للشباب:
هذي فضفضة على السريع، والواحد الحين يبي يريح باله ويعيش الأمان وسط أهله وعياله بعيداً عن إزعاج المايكات الخربانة والبثوث الغريبة.
شاركوني في التعليقات.. وش أغرب نوعية بثوث مرت عليكم وتمنيتوا إنكم ما فتحتوها؟
وفي الختام
نستودعكم الله والسلام عليكم ورحمة الله وبركاته
