السلام عليكم ورحمة الله وبركاته
كيفيكم شخباركم يا أحلى واقوى الأساطير
اليوم راح اتكلم عن شي انت تقوله تراه ماله داعي، في بعض الألعاب في مستويات صح؟ مثل سهل، متوسط، صعب، وعالي الصعوبة. طبعاً تختلف المسميات في بعض الألعاب مثل مبتدأ ومحترف الخبير، وتطلع لنا منها عينات عجيبة:
النوع الأول: المعصّب "المتناقض"
تشوفه لعب في السهل واختمه، والمتوسط واختمه، ويجي عند الصعوبة أو عالي الصعوبة وبالموت وصل عند الزعيم (أياً كان هو الزعيم). وتشوف الزعيم يشدخه تشدخ ويلحقه في كل مكان، وخويك تشوف ماكل كلمة ما يقولها؛ سب ولعن، وعلاوة على ذاك يكسر اليد! ليه؟ تبي الزعيم ينسدح يمك ويقول تعال تكفى لا تطلع تعال طقني
النوع الثاني: "الملتمس" (أبو حبة اضغط؟)
هذا اللي ما يعرف يلعب وأنت تجبره يلعب. يقول لك: "وش اسوي؟ أي حبه اضغط؟" وهنا تكون الكارثة! تشوفه يضغط وبس وبسرعة، تقول ماسكه التماس كهربائي وهو يضغط وينتفض وتحصله عاض السانه ماتدري وش موده
النوع الثالث: "الزعول"
هذا عاد الصنف الحساس اللي يزعل بسرعة؛ إذا زعل فجأة وبدون مقدمات ترك القيم وقام والسبب ماتدري خف علينا يا ناعم ياكيوت حطك كيرم قم برا
النوع الرابع: "المحلل"
هذا اللي يحلل اللعبة ويكرهك فيها من كثر ما يعيدها! يلعبها اكثر من 6 مرات ولا يمل منها أبد، حافظها صم وكل أسرارها يعرفها خلاص يا مسلم اعتق اللعبه
النوع الخامس: "الحقود"
هذا إذا هزمته في التحدي تشوفه ما يرد عليك أبداً، ومن يشوفك خلاص بتفوز، يا يروح يطفي الجهاز فجأة أو يسحب اليد منك عشان يخرب عليك!
وفي الختام:
عالم الألعاب الأوف لاين مليان قصص وتجارب، بس هالعينات هي اللي تعطيه نكهة خاصة تخلينا نضحك حتى لو كنا نلعب بروحنا. شاركوني في التعليقات، أي نوع من هالعينات الخمسة مر عليكم في حياتكم الواقعية؟ وأي صنف منهم أنت؟
وعشان نكون واقعيين، القيمنق بالأساس وُجد عشان نفصل عن هموم الحياة ونضحك على مواقفنا السخيفة قدام الشاشة. سواء كنت المعصب اللي يصارخ أو الملتمس اللي ما يدري وين الله حاطه، تظل الذكريات هذي هي أحلى ما في الجيمنج. خذوا الأمور ببساطة، ولا تخلون الألعاب تعكر صفو أيامكم، وابقوا دايم روّاقين ومستانسين!
نشوفكم على خير في المقال الجاي، والسلام خير ختام! 🌴👋
نستودعكم الله والسلام عليكم ورحمة الله في امان الله
